Bîranîna Elî Kaşifpûr

PÊŞGOTIN

Xwandevanên hêja!

Ev pirtûka bîranînê, tenê ji bo qedirnasîya zehmet û çalakîyên şehîdê nemir kek Elî Kaşifpûr (Kaşifî) hate amadekirin. Di vê pirtûkê da, em tenê li ser hindek pirs û çalakîyên giştî sekinîn. Ji ber ku şertên îro yên têkoşînê û rewşa Kurdistanê, desturê nadin ku em behsê hemû tişt û pirsan bikin û birêjin ser kaxezê. Gava roj hat, ev pirse divêt wekî dîrokê bêne nivîsîn. şehîd Elî, hemû pirsên girîng yên tevgera, rojane û wekî bîrewerî dinivîsîn û xweşbextane piranîya wan nivîsar û bîrewerîyan jî hene û em hêvîdar in, ku rojekê bi pêkhatina şertên di rê da, ne tenê ev bîrewerî, belkî hemû rûdayên girîng yên tevgerê, di pirtûkekê da bêne weşandin.

Di dawîyê da; em spasî kek Rojan dikin, ku pirtûk bi tîprêzî, mîzanpaj û redaksîyonê ve amadeyî weşan û çapê kir. Disa spasî Weşanxaneya Xanî & Bateyî dikin, ku pirtûk di nav weşanên xwe da weşand.

Herweha spasî kek Xosrow û kek Mizefer jî dikin, ku di wergêrîya ji farisî bo kurdî û herweha guhartina ji soranîya tîpên kevin bo kurmancîya latînî da gelek zehmetî kêşan.

Helbet li hemû dost û hevalên ku bi dîtin û bîranînên xwe yên di derheqa Elî da beşdariya pirtûkê kirine jî, bi germî û ji dil spas dikin.

Digel hemû dost û hevalan, divê em spasî binemala Îsmaîlzade jî bikin, ku di hawara Elî da, her dem mil bi milê me ve bûn.

Hêvîdar in ku xwuna van hemû şehîdan bi avê da neçe û digel hemû xelkê me yê zorlêkirî, binemalên şehîdan jî bigihin xwezîyên xwe yên demîn: Serxwebûn, azadî, aştî û demokrasî ji bo Kurdistanê!

Malbata şehîd Eli Kaşifpûr
Adar 1997