PEYVA KEPIRÊ
Gelek ziman hene ku ji zimanê me pêşkevtîtir û dewlemendtir in. Ji zimanê me pirtir pirtûk, kovar û rojname pê derdikevin. Pirtir fîlm û stran pê dihêne çêkirin û gotin. Lê çi ziman ji zimanê me şîrîntir nînin. Ji ber ku ew ji bilî ku nasnameya me ye, yekemîn ziman e me bihîstîye, yekemîn ziman e em pê axifîne û çiqas em zimanên dî fêr bibîn jî dê her ew bimîne xoştirîn ziman em hest, soz, hizir û bîrên xwe pê derbibirin, eger em baş fêr bibin.
Mirov zimanê xwe ji dayik, bab, bira, xuşk, heval û hwd fêr dibe, lê bi xwendinê dewlemend dike û ew mirovê nexwendevan be yan jî berdewam nexwîne hem zimanê wî û hem zanîna wî jî dê hejar bimîne û di encam de şansê serkevtina wî ya di jiyanê de jî dê kêmtir be.
Mixabin, rewşa ku gelê me tê da dijî weha kirîye ku zimanê me li paş bimîne, pirtûkxaneya me hejar bimîne, zarokên me zimanên biyanî ji zimanê xwe baştir bizanin û bi wan zimanan jî bi hêsantir bixwînin û di encam da sal bo salê zimanê wan kiz û lawaztir lê dihêt û di dawîyê da dev ji zimanê xwe berdidin û êdî hew pê diaxivin jî.
Ji bo ku em rê li vê diyardeyê bigirin diviya em hewl bidin da ku pirtûkxaneyeka dewlemend û rengîn ava bikin. Em kovaran derbixin. Her bi vê armancê herdu weşanxaneyên kurdî Spîrêz li Duhokê û Apec li Stokholmê vê kovarê bo zarokên kurd li Ewrupayê derdixin.
Kovara Kepir kovareka navdar e li Kurdistana başûr û ev pirtir ji çar salan e, heyvane derdikeve û zarokên kurd dixwînin û jê hez dikin.
Ev hejmara yekê ye li Stokholmê çap dibe. Hêvîdar in babet, nexş û nîgarên wê bi dilê we bin û hûn bi pêşniyar û berhemên xwe wê bi xeml û rewştir lê bikin.
Kepir ji bo we ye, xwedî lê derkevin.
Heta hejmareka dî hûn şad û Kepira we ava.
Sernivîser
Helbestvanê mezin
Melayê Ciziri
1570- 1640
Melayê Cizîrî navdartirîn helbestvanê kurd e. Helbestên wî ciwan, rewan, sivik û kûrwate ne. Dîwana wî ya ku ji 125 helbestan pêk dihêt li bal me kurdan wek pirtûkeke pîroz têt qebûlkirin. Ev dîwana wî bi sedan salan li seranserê mizgeftên Kurdistanê dihate xwendin. Bi hezaran feqe û melayan helbestên wî ji ber dikirin. Ev dîwana Melayê Cizîrî gelek caran li Kurdistanê û derveyî Kurdistanê hatîye çapkirin û gelek vekolînên zanistî û akademîk li ser hatine kirin. Melayê Cizîrî ji bilî ku helbestvanekî navdar bû, zanayekî serdema xwe jî bûye. Ji bilî zimanê xwe yê kurdî, wî bi erebî û farisî jî baş dizanî.
Navê wî Şêx Ehmedê kurê Şêx Mihemedê Cizîrî bû. Li Cizîra Botan ji dayik bûye. Wek zarokên serdema xwe li mizgeft û dibistanên ayînî dest bi xwendinê kirîye. Her li Cizîrê jî çûye ber dilovanîya Xwedê û li Mizgefta Sor hatîye veşartin. Gora wî heta îro jî wek ziyaretgehekê ye, xelk bi berdewamî diçin tewafa wî.
Şox û şengê, zuhre rengê, dil ji min bir, dil ji min
Awirên heybet pilingê, dil ji min bir, dil ji min
Wê şepalê, misikxalê dêm durrê gerden şemalê
Cebheta biskan sema lê, dil ji min bir, dil ji min.
Kepir, kovara zarokan, jimare 1, sal 2007
Ali Ciftci
Mueyed Teyib
Mahmûd Lewendî
Necmeddîn Bîrî
Weşanên Apec & Sipîrêz
Utges av Apec Förlag AB, ansvarig utgivare: Ali Ciftci
Kovara zarokanl du mehan carekê bi hevkariya Apec û Spitrêz derdikeve
Adress: Apec Förlag AB
Box 8121
SE 163 08 Spanga / Sweden
Tel: 08-761 8118
Fax: 08-7612490
E-post: apec.t@telia.com
www.kepir.org
www.apec.nu
www.spirez.org
ISSN 1654-5702
Journals
