Sanikan û deyîranê Licê ra
1) Şak û pire
Tîya bi û çinê bî, babîke û hîrê hebî lacê xo (xu) bî. Babî tirt kono, zirt mireno. Veri mergê xo wesî keno, vano:
- Lacê min, şima çi ray nêşorê serê Koy Qiramekan1 nêçîr (seyd).
Ê vanê:
- Nê, nê.
Çendeyke ser o vêreno ra, birawo pîl vano:
- Ez şina nêçîr.
Biray bînî vanê:
- Bira, nêbeno. Baboy wesî kerda, vato "meşorê serê Koy Qiramekan nêçîr".
Kenê nêkenê, tede nêqedênenê. Vano:
- Nê! Kafirê Homay kişte bo ezo şin?!
Wirzeno tîr û kevanê xo gêno (gîno) û verê xo şano serê Koy Qiramekan.
Şino serê Koy Qiramekan, hende vîneno xezalêke ver wirzena we. Ha tîya ha haca, xezale mixarayike ro şina war.
.....
(1) Qiramekan (Qirameki): Mezrayêk Licê ya.
Tedeyî
A) Sanıkî / 7
1) Şak û pîre / 9
2) 'Elik û çûçe / 19
3) Pîre û pisînge / 31
4) Liwe û quling / 35
5) Sîr û pîyanz / 41
6) Her û ga / 49
7) Birawo aqil û birawo gêc / 57
8) Liwe û şêr / 59
9) Mar û citêr û liwe / 63
10) Kêz xatûne / 67
11) Hera herrîne / 73
12) Mamo Hewêz / 87
13) Pîre û dîk / 91
14) Hîrê lacê paşay / 97
B) Deyîrî / 103
1) Ehmedê Musê axan / 105
2) A çi keyna wa / 107
3) Meşkê / 109
4) Heroy loy / 110
5) Xumxumê / 111
Vateyo verên
Lehçeya kirmanckî (zazakî) hetê edebîyatê fekkî (sözlü edebiyat) ra pêt (zengin) a. La semedo ke malzemeyê nê edebîyatî zaf kêmî nusîyayo, roje bi roje vîr a şono, vîndî beno. Azê (neslê) neweyî, bi taybetî zî kesê ke şaristan (bajar) de dayîka (maya) xo ra benê û gedeyîya (domanîya) xo uca vîyarnenê, yan nê edebîyatî ra kêmî xeberdar î yan zî bêxeber î. Eke wina şêro, edebîyatê mayê fekkî yo ke heta ewro mendo zî vîndî beno. Bi vîndîbîyayîşê ney, ziwan û kulturê ma zî zaf çîyan vîndî keno. Ewro hema wext û firset nêvîyarto la roje yena ke hinî (êdî) merdim biwazo zî nêşeno (nêeşkeno) malzemeyê nê edebîyatî binuso. Madem ke wina ya, ganî ma destanê xo nêdekê pistanê xo û nêvindê, ganî ma semedê arêkerdiş û nuştişê malzemeyê xoyê folklorîkî nika ra polanê xo to bikê.
Nê serranê peyênan de malzemeyê edebîyatê fekkî yê kirmanckîya Dêrsimî, Pîranî, Çewlîgî û Sêwregi ra tayê nimûneyî arê bîy û se kitab vejîyay. La nê bes nîyê. Gani malzemeyê folklorîk yê mintiqayanê bînan zî binusîyo. Kitabo ke destê şima de, no ware de sey (zê) gamêka newa yo.
Nê kitabî de arêkerdeyê (derlemeyê) Mihanî Licokicî ca gênê. Vêşaneyê sanikan û deyîranê (estanekan û kilamanê) nê kitabî, veri rojnameyê (gazeteyê) Armanc û kovara (dergîya) Vateyî de weşanîyaybî (neşr bîbî), nika zî heme pîya se kitab vejîyênê. Mihanî nê sanikî û deyîrî mintiqaya Licê ra arê kerdê û sey vatişê na mintiqa nuştê. No kitab kitabo verên o ke tede tena nimûneyê edebîyatê fekkîyê kirmanckî (zazakî) yê mintiqaya Licê pêser benê. No semed ra zî balkêş o.
Mi bi xo wendişê sanikan û deyîranê nê kitabî ra zaf tehm girewt, hêvîya mi a ya ke şima zî wendişê nînan ra tehm bigîrê.
15.01.2006
Malmîsanij
Mihanî Licokic
Sanikan û deyîranê Licê ra
Vate
Kitab: 23
Arêkerde: 5
Sanikan û deyiranê Licê ra
Arêkerdox: Mihanî Licokic
Çape: Berdan matbaası
İstanbul, 2007
Edîtor: Deniz Gunduz
Mîzanpaj: Deniz Gunduz
Redaksîyon: M. Malmîsanij
Xebata qapaxî: Minife Yıldızhan
Vate yayınevi
Katip Mustafa Çelebi mah.
Tel sok. no: 18 kat: 3
Beyoğlu / İstanbul
Tel: 0212-244 94 14
E-posta: kovaravate@yahoo.com
ISBN: 978-975-6278-14-7
