TEFSÎRA QURANÊ
1 - Sûreyê destpêkirinê Heft Ayet in, di Mekê de dahatiye
Bi navê Xudayê pak ê dilovan û mihrivan Pesin ji Xwedê re ye, ji nav û kerema wîr re ye ko Xudanê erd û ezmana ye * Rehman e; dilovan e; rehîm e; mihrivan e * Xwediyê roja piştdawiyê ye * Em ibadeta te dikin, û ji te hêvîdar in * Me bide ser riya rastiyê * Rîya wan mirovên ko tu li wan hatiyî rehmê; ne peyayên ko ketine ber Xezeba te û ne kesên ko dane ser riya şaş.
2 – Sûreya Çêlekê Du sed û heştê û şeş ayet in Di Medînê de dahatiye
Bi navê Xudayê pak ê dilovan û mihrivan 1 -E.L.M. Ji wan herfan miraz çi ye Xwedê dizane. 2 – Ew kitêb bê şik ji bona bawermendan reyeke rast e. 3 - Yên ko baweriya xwe bi xeybê (mina bihuşt û dojehê) tînin, nimêja xwe dikin û ji rizqê ko me daye wan, di riya Xwedê da didin, arîkariya sêwî û belengazan dikin. 4 - Ew bawermendên ko bi kitêba ko ji te re dahatiye û bi yên ko berî Quranê dahatine bawer dikin û bi Axiretê înaniya xwe tînin û pê ewle ne. 5 - Wan bi kerema Xwedê dane ser riya rastiyê û ewê bigehin rehm û qenciya Xwedê. ..... |