DERHEQÊ NUŞTOXÎ DE
Alî Aydin Çîçek, serra 1984 de Gimgim de ameyo dinya. Hetanî lîse Gimgim de wendo. Unîversîteyê Duzce de qeydê xo viraşta labelê seba ke vera leşkerbîyayîşî heqa xo ya "Redkerdişo Wîjdanî" xebetnayo, heqê wendişî dest ra ameyo girewtene.
Alî Aydin Çîçek 2003 ra no het îstanbul de ciwîyeno. Gama ke dezgeyê UNESCOyî derheqê rewşa vindîbîyayîşê lehçeya kirmnackî de rapor beyan keno, no rapor tesîrê ey keno û Enstîtuya Kurdî ya Îstanbulî û Weşanxaneyê Vateyî de verî derse gêno, dima o bi xo dersa ziwanî dano.
Hîkaya ey a bi sernameyê "Xêx"î 2009 de musabeqaya hîkaye û şîîran a des û hewtine ya Huseyîn Çelebî de xelata dîyîne gêna. Dima, musabeqaya fiqrayana ke keyepelê Zazakî.Netî organîze kerde, fiqraya ey a bi sernameyê "Şima Teskere Nêdanê, Dewlete Dana" xelata yewine gêna. Hewna, 2010 de, musabeqaya hîkayeyan a Abdullah Duranî de yew hîkaya ey xelata mansîyonî gêna. U musabeqaya hîkaye û şîîran a des û heştine ya Huseyîn Çelebî de zî şîîra ey "Xatir" xelata yewine gêna.
Eserê ey ke weşanîyayê:
Teberik, Wesanxaneyê Vateyî, Istanbul, 2010
Amadekerdisê ne kitabî de înane ke mi de alîkarîye kerda û bêrê (çêverê) xo mi re kerdo ya, înane ke qiseyê xo û rindekîya zerrîya xo mi de pare kerda pêrune rê zerrî û can ra zafzafsipas kena...
Qot
Zemanê ju axa beno, hîrê biray benê. Nî hîrê biray tabî zaf feqîr benê. Feqîr benê roza juyê birawo ju pîyê xo ra vano ke:
- Bawo ez na wo şonane gurbete, xo rê xebetînane tenê pere kuno ra mi dest, rusnena sima rê durumê ma rind nîyo. Pî vano:
- Meso! Ma rê pere lazim nîyo. Gurbete meso!
O kî vano:
Nê, sonane.
Eke vano "sonane" pî çîyê nêvano îndî.
Dano piro sono. Dano piro sono xeylê saat sono. Xeylê saat sono qefelîno nîşeno ro nonê xo weno. Nonê xo xeleşîno onca kuno ra raye xeylê sono. Xeylê sono beno vêsan. Eke beno ... |