UNITEYA 1.
Wendegehe Mi
Beşê 1. Demê wendene û goşdarîkerdene
Mamosta ewro wendegeh de, derse de ma ra persa: — Qeçekêno, babeta dersa ma “metodê serkewtişî” yê. Gelo goreyê şima seba serkewtene ganî ma çi bikîy?
Rojda: Mamosta, goreyê mi, verê ke ma bêrîy wendegeh ganî ma amadekarîya dersan bikîy. Leyla: Ez zî vana ke derse de ganî ma weş goşdarîya mamostayî/e bikîy.
Roşna: Goreyê mi zî demo ke ma babete fehm nêkîy, ganî ma mamostayî/e ra pers bikîy. Sînaya: Mamosta, mabênan de ganî ma arisîy ke ma derse de bişêyîy bala xo bidîy babetan ser.
Kerem: Demo ke ma wendegeh ra agêrenê keye, ganî ma verê kincanê xo bivurnîy, werd biwerîy û bîna xo bigîrîy. Kejê: Badê ke ma keye de bîna xo girewte ganî ma dersanê xo tekrar bikîy û wezîfeyanê xo virazîy. Mîhrîbane: Seba ke ma ser bikewîy ganî masa û odaya ma biserûber bîy.
Fîraz: Eke ma verê televîzyonî de yan zî mîyanê hayleminî de derse bixebitîy ma fehm nêkenê.
Bawer: Demo ke ma derse bixebitîy ganî badê çewres û pane deqayan ma pancês deqayî bîna xo bîgîrîy.
Barzan: Ganî ma wezîfeyanê xo wextê xo de virazîy. Xezale: Seba ke ma rew hişyar bibîy ganî ma rew rakewîy. Aske: Ganî hertim bemameyêkê ma estbo û ma goreyê ey bixebitîy.
Mamosta: Qeçekêno, şima çîyê rastî vatîy. Biciwîyîn! Eke şima nê xususan weş bizanîn û bîyarîn ca, şima do bi asanî ser bikewîn.
..... |