Dêsan de Sûretê Ma Nimite

Auteur :

Présentation	Table des Matières	Introduction	Identité	PDF
Dêsan de Sûretê Ma Nimite Roşan Lezgîn Vate Mi her di destê xoyê hubrênî sey di şaxanê nazikan ramitî Zimistanî da piro, pûk ser de şi û xezeb û bêwayîrî... Mi kefaretê xo da, qîyamet û mehşerê xo vîyarnay Mi fêkîyê Baxçeyê Adenî serê engiştanê xo ra çînay Û mi kederê xo ra ezber kerde na sanika raştikêne Ax her kes qîyametê xo ano û her kes mehşerê xo Her kes Adenê Baxçeyê xo yo, ey xerîbê welatê xo!... Roşan Lezgîn, serra 1964 de dewa Dingilhewa ya Licê de ameyo dinya. Tenya çar serrî mekteb wendo. 1995 ra nat zafê kovar û rojnameyan de bi kurdkî (kirmanckî û kurmanckî) û tirkî nuşteyê ey ameyê weşanayîş. Roşan Lezgînî bi kitabê xoyê hîkayan (Binê Dara Valêre de) xelata edebîyatî ya Apec Förlag AB-2002 girewte. Hêna bi yew hîkaya xo (Serkewtena Zerencan) Musabeqeya Hîkayanê Domanan a Yewine ke Beledîyeya Sûrî ya Dîyarbekirî organize kerdebî de Xelata 2. girewte. Eserê ey ke se kitab hetanî nika temam bîyê, nê yê: 1. Binê Dara Valêre de, Çap-1. Apec-2002, Stockholm, Çap-2. Vate-2002, İstanbul 2. Lİ Bin Dara Bîyê, Elma-2003, İstanbul 3. Hîdayet Sadiq, Sê Dilop Xwîn (Wergerandina ji farisî), War-2004, Dîyarbekir 4.Samancı Suzan, Siya Bêdengiyê (Wergerandina ji tirkî), Aram-2001, İstanbul 5. Ferhengê îdyomanê Kurdkî (Kirmanckî/Zazakî), Vate-2005, İstanbul



DESTÛR Nuştiş, awa heyatî şimitiş o. Ber Xellacê Mansûrî vano, "Eke merdim bizano kamca ra ameyo, do hol bizano ke şino kamca zî." Û Albert Camus zî vano, "Welatê merdimî yo raştikên, ziwanê merdimî yo. Ez, sînoranê ey de nöbete gêna." Kilît Her çekuye de boya areqê hezaran serrî Her çekuye de ruhê welatêkê esmen Hubr Boya hubrê qeleme Vemîya şinge-şinga şimşêrê goninî xo resnena heme welatan... Û Homayî bi xo zî rêça hubrê qeleme de xo nawit bi ma Homayîya xo bi ma evdan da qebûlkerdiş; (Ellezî 'elleme bîl qelemî...) Şahî, sultanî, qiralî Amey û şîy Hezaran tîranî... Qesran û qonaxan ra çi mend? Kerrey helîyayî; bîy welî Tenya rêça hubrê qeleme baqî mend û mend. Her kes rengê xo de rind o, her kes vengê xo de... Çi wexto ke wisar destanê xoyê keskan ro mi keno derg Senî a game ez lewanê ey ra şimena poşmanîya teyrê Pepûgî: -Kamî kişt? -Mi kişt!.. (Şîyayey tepîya nêagêrenê!...) Û a kardîya ke ez misêwa fekê aye hesan kena Ax destanê şima kamî ra damaranê mi birmena? Na gonîya girênaya Na gonî damaranê mi ra herikêna mîyanê zerrîya şima ra kamî? Ax na gonîya ke boya hubrî tira yena!... .....