|
"Mi va nesîp bo şopê welatî ser de
bêrî bêrî bêrî...
Mi va şopê welatî ser de
Şêrî şêrî şêrî...
Dewrêş Baba
Teberik
-I-
Asmên hîra yo, koyî berz ê, şewe tarî ya...
Aşme şewle dana şewe û puy waneno. Dûrî ra dûrî vengê tifingan êno, vengê cengî... Va pelanê daran ra ancîno û şono. Asmên ra astareyî bereqînê. Binê yew valêre de yew merdimo kokim û yew lajekî...
-II-
Kokim gêra ra lajekî û vat:
- Ero bawo, bawo! Ma ez mebermî kam bibermo. Zereyê mi veşeno, cîgera mi dejena, cîgera mi...
Lajekî bêveng sereyê xo kerd xo ver û winî vinet. Kokimî reyna ver kerd ci û vat:
- Ero bawo, bawo! Cîgera mi dejena, cîgera mi. Lajê mi, kênaya mi, can û rîyê mi mîyanê nê şerî de şî.
Kokimî milê xo kerd çewt û berma.
Berma.
Hesirê çiman sey şilîya wisarî varay erdîşa sipîye ser. Peynîye de lajekî dîyax nêkerd û qayîtê rîyê kokimî kerd û ey ra vat:
- Kalo delal, de mi ra vaje, mîyanê nê erd û asmênî de, binê tîja Homayî de derd û kulê kamî çin o? Derd û kulê kamî çin o ke wa mebermo. Her kes wayîrê yew derdi yo, wayîrê yew janî... Teyrûtur derdê xo rê waneno serê dar û kemeran de.
Kokimî sereyê xo kerd berz û hesirê çimanê xo kerdî pak. Şopê winî vinet û dime ra vat:
- Heya lajo heya, vatena to rast a, pepûg şew û roje xo rê wanêno, derdê xo rê, janê xo rê... Ez se bikerî, kamta şorî? Di cîgerê mi mîyanê nê şerî de, mîyanê nê adirê bêbextî de veşay. Vaje lajo, vaje mi ra, ez se vengê înan, ez se boya înan xo vîr a bikerî? Ez se çimanê înan xo vîrî ra bikerî? Ê winî verê çimanê mi de, hewnê mi de, xeyalê mi de...
Vinet. Vinet û berma. Xeylê wext sey domanê winî berma. Dime ra destê xo kerd tûnika êlega xo û yew teberik ci ra vet. Defêdi defeyî maçî kerd û berd çareyê xo. Teberik kerd mîyanê lapa xo û zixm şedinit. Dime ra va:
- No teberik domananê mi ra, mi rê mend. Tena no înan ra mi rê mend. No teberik bavokê min o. Hetanî ke bimirî no leyê mi de yo. Hetanî ke...
-III-
Lajekî vengûvaj xo ra birna û goş na vengê vayî ser. Asmên ra aşme şewle dayêne şewe.
Tenik-tenik va ameyêne. Vengê vayî de vengê tifingan, vengê şerî... Va ameyêne û pelê valêre sivik-sivik verê sura vayî de reqesîyayêne.
Xeylê wext mîyan ra derbaz bî. Merdimê kokimî sereyê xo ver bi asmênî kerd berz û qayîtê aşme kerd. Roştîya aşme hesiranê çimanê ey de bereqîyayêne. Kokimî xo bi xo bêveng va:
"Ax dinya! Werekna ez zî pepûg bîyêne û dima vayî, dima şilîye winî şew û roje mi janê xo to rê biwendêne."
1-Na hikaye Zazakî.NETî de weşaniyaya û hetê Roşan Lezgînî ra redakte biya.
.....
| 
